சேலம்:
வடகிழக்கு பருவமழை தீவிரம் அடைந்ததை தொடர்ந்து சேலம் மாவட்டத்தில் பரவலாக மழை பெய்து வருகிறது. நேற்று இரவு இடைவிடாமல் மழை வெளுத்து வாங்கியது. இன்று காலையில் இருந்து சாரல் மழை பெய்தது.
குறிப்பாக கெங்கவல்லி, மேட்டூர், காடையாம்பட்டி, ஆத்தூர், ஏற்காடு, வீரகனூர் உள்பட பல பகுதிகளில் நேற்றிரவு கன மழை பெய்தது. இந்த மழையால் அந்த பகுதிகளில் உள்ள சுவேத நதி, வஷிஷ்ட நதி மற்றும் பல ஓடைகளிலும் தண்ணீர் தொடர்ந்து பெருக்கெடுத்து ஓடுகிறது. மேலும் ஆத்தூர் பகுதிகளில் உள்ள பெரும்பாலான ஏரிகள் நிரம்பி உள்ளன. வயல்வெளிகளில் தண்ணீர் தேங்கி உள்ளது.
ஏற்காட்டில் நேற்றிரவு 10 மணிக்கு தொடங்கிய மழை 3 மணி நேரம் கன மழையாக கொட்டியது. இந்த மழையால் தாழ்வான பகுதிகளில் தண்ணீர் தேங்கியது. மேலும் ஏற்காட்டில் பெய்யும் தொடர் மழையால் கடும் குளிர் நிலவி வருகிறது. இதனால் சுற்றுலா பயணிகள் வருகை குறைந்துள்ளது.
கனமழையினால் மேட்டூரை அடுத்த வீரக்கல் புதூர் பேரூராட்சிக்குட்பட்ட புதுசாம்பள்ளி பகுதியில் 12-வது வார்டு மற்றும் 9-வது வார்டு பகுதிகளில் நேற்று இரவு மழைநீர் வடிகால் ஓடையில் குப்பை கூளங்கள் அடித்து வரப்பட்டு அடைப்பு ஏற்பட்டது இதனால் ஓடையை ஒட்டி அமைந்துள்ள சுமார் 50-க்கும் மேற்பட்ட வீடுகளில் தண்ணீர் வீட்டுக்குள் புகுந்தது. இதனால் பொதுமக்கள் இரவு முழுவதும் தூங்க முடியாமல் அவதிப்பட்டனர்.
வீரக்கல்புதூர் பேரூராட்சி அலுவலகத்திற்கு இது பற்றி தகவல் தெரிவித்தனர். நிர்வாக அதிகாரி நந்தகுமார் மேற்பார்வையில் பேரூராட்சி நிர்வாகத்தினர் சம்பவ இடத்திற்கு வந்து ஓடைகளில் அடித்து வந்த குப்பை கூளங்களை அகற்றி தண்ணீர் வழிந்து ஓட வழிவகை செய்தனர். இதனால் பொதுமக்கள் நிம்மதி அடைந்தனர்.
சேலம் மாநகரில் நேற்றிரவு தொடங்கிய மழை இன்று காலை வரை சாரல் மழையாக பெய்தது. ஏற்கனவே சேலம் மாநகரில் அழகாபுரம், சோனாநகர், பச்சப்பட்டி உள்பட பல பகுதிகளில் குடியிருப்புகளை தண்ணீர் சூழ்ந்துள்ள நிலையில் இந்த மழையால் தண்ணீர் தேக்கம் மேலும் அதிகரித்துள்ளது.
மாவட்டத்தில் அதிக பட்சமாக கெங்கவல்லியில் 83.6 மி.மீ. மழை பதிவாகி உள்ளது. மேட்டூர் 59.4, காடையாம்பட்டி 37, ஆத்தூர் 36.4, ஏற்காடு 31.4, வீரகனூர் 26, ஓமலூர் 17.1, ஆனைமடுவு 17, பெத்தநாயக்கன்பாளையம் 15, தம்மம்பட்டி 10, கரியகோவில் 9, சேலம் 4.4, எடப்பாடி 4, சங்ககிரி 2 மி.மீ. என மாவட்டம் முழுவதும் 352.30 மி.மீ. மழை பெய்துள்ளது.
